September 27, 2021

KleaBe.Com

Të Gjitha Këtu për Ju

“Vetëm thuaj se pati manipulime”: Presioni i Trumpit për zgjedhjet e 2020-s – KOHA.net

3 min read

Ish-presidenti amerikan, Donald Trump, ka ushtruar presion mbi zyrtarët kryesorë të Departamentit të Drejtësisë për të deklaruar rrejshëm se zgjedhjet e 2020-s ishin të manipuluara. Krejt kjo, sipas disa memoareve të porsapublikuara, kishte për synim që ai dhe aleatët e tij në Kongres të mund t’i përmbysnin rezultatet dhe që Trumpi të rikthehej në detyrë.

“Vetëm thuaj se zgjedhjet ishin të manipuluara (dhe) tjerat lërmi mua”, i ka thënë ish-presidenti ushtruesit të mëhershëm të detyrës së prokurorit të përgjithshëm, Jeffrey Rosen, dhe zëvendësit të tij, Richard Donoghue. Citatet janë pjesë e memoareve të siguruara nga komiteti për mbikëqyrje i Dhomës së Përfaqësuesve, ka raportuar e përditshmja britanike “The Guardian”. Shënimet janë marrë nga Donoghe, i cili ka dokumentuar telefonatën e 27 dhjetorit midis Trumpit dhe Rosenit.

Kërkesa e Trumpit paraqet një instancë të pazakontë, në të cilën një president synon që të ushtrojë ndikim mbi agjencinë që supozohet të operojë e pavarur prej Shtëpisë së Bardhë, me qëllim të avancimit të interesave dhe agjendës së tij politike. Është njëherësh shembulli më i fundit i fushatës së gjithmbarshme të ndërmarrë nga Trumpi gjatë javëve të fundit të tij si president, për t’i minuar rezultatet e zgjedhjeve të 2020-s, të cilat ai i humbi kundruall presidentit aktual amerikan, Joe Biden, në garën e shënuar me akuza të vazhdueshme për mashtrime me vota.

Në telefonatën e dhjetorit, Guardian raporton se Donoghue i ka thënë Trumpit që Departamenti i Drejtësisë nuk ka kompetenca për ta ndryshuar rezultatin e zgjedhjeve, të cilit pretendim ish-presidenti i është përgjigjur se ai nuk ka pritje të tilla, porse ai dhe aleatët e tij në Kongres do t’i avancojnë pretendimet rreth mashtrimeve me vota.

Trumpi nuk i ka përmendur specifikisht pjesëtarët e Kongresit që janë pjesë e planit të tij, por në raste të caktuara gjatë bisedës u referohet republikanëve të Dhomës së Përfaqësuesve, Jim Jordan dhe Scott Perry, si dhe përfaqësuesit republikan në Senat, Ron Johnson, i cili ishte mbrojtësi i tij më i zëshëm në Capitol.

“Memoaret e Donoghues, të cilat i janë dorëzuar Komitetit për Rishikim që po i heton Trumpin dhe sulmin e 6 janarit në Konfres, i ndërlidhin në mënyrë të drejtpërdrejtë republikanët kyçë me fushatën e tij të dezinformimit për zmbrapsjen e paligjshme të rezultatit të zgjedhjeve”, ka shkruar gazeta britanike.

Në bisedën e dhjetorit, shënimet tregojnë se që të dy zyrtarët nën presion i janë kundërvënë Trumpit, i cili në një pikë, pretendon se ka pasur mashtrime të gjithmbarshme zgjedhore në Georgia, Michigan, Nevada dhe Arizona. Këto mashtrime ai i përshkroi me termin “zgjedhje të korruptuara”, një vlerësim ky që ka nxitur menjëherë dënimin nga Donoghue.

“Pjesa më e madhe e informatave që po i siguroni janë të rreme”, i ka thënë Donoghue Trumpit, duke shtuar se Departamenti i Drejtësisë ka ndërmarrë me dhjetëra hetime rreth pretendimeve të tij, por se nuk ka evidentuar saktësi. “I kemi shikuar pretendimet, por nuk përkojnë”.

Mirëpo Trumpi, i palëkundur dhe qartazi i shqetësuar për largimin e tij pasues nga detyra, vazhdoi duke thënë: “OK, në rregull – por çfarë ndodh me të tjerët”, thuhet në dokumente, duke specifikuar se ish-presidenti me këtë u referohej konspiracioneve të tij rreth mashtrimeve në Georgia. “S’ka mbetur shumë kohë”, ka shtuar ai, raporton Guardian.

KOHA.net